8. ปุลินถูปิยตฺเถรอปทานํ
[57]
‘‘หิมวนฺตสฺสาวิทูเร , ยมโก นาม ปพฺพโต;
อสฺสโม สุกโต มยฺหํ, ปณฺณสาลา สุมาปิตาฯ
[58]
‘‘นารโท นาม นาเมน, ชฏิโล อุคฺคตาปโน;
จตุทฺทสสหสฺสานิ, สิสฺสา ปริจรนฺติ มํฯ
[59]
‘‘ปฏิสลฺลีนโก สนฺโต, เอวํ จินฺเตสหํ ตทา;
‘สพฺโพ ชโน มํ ปูเชติ, นาหํ ปูเชมิ กิญฺจนํฯ
[60]
‘‘‘น เม โอวาทโก อตฺถิ, วตฺตา โกจิ น วิชฺชติ;
อนาจริยุปชฺฌาโย, วเน วาสํ อุเปมหํฯ
[61]
‘‘‘อุปาสมาโน ยมหํ, ครุจิตฺตํ อุปฏฺฐเห;
โส เม อาจริโย นตฺถิ, วนวาโส นิรตฺถโกฯ
[62]
‘‘‘อายาคํ เม คเวสิสฺสํ, ครุํ ภาวนิยํ ตถา;
สาวสฺสโย วสิสฺสามิ, น โกจิ ครหิสฺสติ’ฯ
[63]
‘‘อุตฺตานกูลา นทิกา, สุปติตฺถา มโนรมา;
สํสุทฺธปุลินากิณฺณา, อวิทูเร มมสฺสมํฯ
[64]
‘‘นทิํ อมริกํ นาม, อุปคนฺตฺวานหํ ตทา;
สํวฑฺฒยิตฺวา ปุลินํ, อกํ ปุลินเจติยํฯ
[65]
‘‘เย เต อเหสุํ สมฺพุทฺธา, ภวนฺตกรณา มุนี;
เตสํ เอตาทิโส ถูโป, ตํ นิมิตฺตํ กโรมหํฯ
[66]
‘‘กริตฺวา ปุลินํ [ปุฬิเน (สี. สฺยา. ปี.)] ถูปํ, โสวณฺณํ มาปยิํ อหํ;
โสณฺณกิงฺกณิปุปฺผานิ, สหสฺเส ตีณิ ปูชยิํฯ
[67]
‘‘สายปาตํ นมสฺสามิ, เวทชาโต กตญฺชลี;
สมฺมุขา วิย สมฺพุทฺธํ, วนฺทิํ ปุลินเจติยํฯ
[68]
‘‘ยทา กิเลสา ชายนฺติ, วิตกฺกา เคหนิสฺสิตา;
สรามิ สุกตํ ถูปํ, ปจฺจเวกฺขามิ ตาวเทฯ
[69]
‘‘อุปนิสฺสาย วิหรํ, สตฺถวาหํ วินายกํ;
กิเลเส สํวเสยฺยาสิ, น ยุตฺตํ ตว มาริสฯ
[70]
‘‘สห อาวชฺชิเต ถูเป, คารวํ โหติ เม ตทา;
กุวิตกฺเก วิโนเทสิํ, นาโค ตุตฺตฏฺฏิโต ยถาฯ
[71]
‘‘เอวํ วิหรมานํ มํ, มจฺจุราชาภิมทฺทถ;
ตตฺถ กาลงฺกโต สนฺโต, พฺรหฺมโลกมคจฺฉหํฯ
[72]
‘‘ยาวตายุํ วสิตฺวาน, ติทิเว [ติทเส (สี. ปี.)] อุปปชฺชหํ;
อสีติกฺขตฺตุํ เทวินฺโท, เทวรชฺชมการยิํฯ
[73]
‘‘สตานํ ตีณิกฺขตฺตุญฺจ, จกฺกวตฺตี อโหสหํ;
ปเทสรชฺชํ วิปุลํ, คณนาโต อสงฺขิยํฯ
[74]
‘‘โสณฺณกิงฺกณิปุปฺผานํ [เตสํ กิงฺกณิปุปฺผานํ (สี.)], วิปากํ อนุโภมหํ;
ธาตีสตสหสฺสานิ, ปริวาเรนฺติ มํ [เม (ก.)] ภเวฯ
[75]
‘‘ถูปสฺส ปริจิณฺณตฺตา, รโชชลฺลํ น ลิมฺปติ;
คตฺเต เสทา น มุจฺจนฺติ, สุปฺปภาโส ภวามหํฯ
[76]
‘‘อโห เม สุกโต ถูโป, สุทิฏฺฐามริกา นที;
ถูปํ กตฺวาน ปุลินํ, ปตฺโตมฺหิ อจลํ ปทํฯ
[77]
‘‘กุสลํ กตฺตุกาเมน, ชนฺตุนา สารคาหินา;
นตฺถิ เขตฺตํ อเขตฺตํ วา, ปฏิปตฺตีว สาธกา [สาริกา (ปี.), สารกา (สฺยา.), สารตา (ก.)]ฯ
[78]
‘‘ยถาปิ พลวา โปโส, อณฺณวํ ตริตุสฺสเห;
ปริตฺตํ กฏฺฐมาทาย, ปกฺขนฺเทยฺย มหาสรํฯ
[79]
‘‘อิมาหํ กฏฺฐํ นิสฺสาย, ตริสฺสามิ มโหทธิํ;
อุสฺสาเหน วีริเยน, ตเรยฺย อุทธิํ นโรฯ
[80]
‘‘ตเถว เม กตํ กมฺมํ, ปริตฺตํ โถกกญฺจ ยํ;
ตํ กมฺมํ อุปนิสฺสาย, สํสารํ สมติกฺกมิํฯ
[81]
‘‘ปจฺฉิเม ภเว สมฺปตฺเต, สุกฺกมูเลน โจทิโต;
สาวตฺถิยํ ปุเร ชาโต, มหาสาเล สุอฑฺฒเกฯ
[82]
‘‘สทฺธา มาตา ปิตา มยฺหํ, พุทฺธสฺส สรณํ คตา;
อุโภ ทิฏฺฐปทา เอเต, อนุวตฺตนฺติ สาสนํฯ
[83]
‘‘โพธิปปฏิกํ คยฺห, โสณฺณถูปมการยุํ;
สายปาตํ [สายํ ปาตํ (สฺยา. ก.)] นมสฺสนฺติ, สกฺยปุตฺตสฺส สมฺมุขาฯ
[84]
‘‘อุโปสถมฺหิ ทิวเส, โสณฺณถูปํ วินีหรุํ;
พุทฺธสฺส วณฺณํ กิตฺเตนฺตา, ติยามํ วีตินามยุํฯ
[85]
‘‘สห ทิสฺวานหํ [ปสาเทตฺวานหํ (ก.)] ถูปํ, สริํ ปุลินเจติยํ;
เอกาสเน นิสีทิตฺวา, อรหตฺตมปาปุณิํฯ
ทฺวาวีสติมํ ภาณวารํฯ
[86]
‘‘คเวสมาโน ตํ วีรํ, ธมฺมเสนาปติทฺทสํ;
อคารา นิกฺขมิตฺวาน, ปพฺพชิํ ตสฺส สนฺติเกฯ
[87]
‘‘ชาติยา สตฺตวสฺเสน, อรหตฺตมปาปุณิํ;
อุปสมฺปาทยี พุทฺโธ, คุณมญฺญาย จกฺขุมาฯ
[88]
‘‘ทารเกเนว สนฺเตน, กิริยํ นิฏฺฐิตํ มยา;
กตํ เม กรณียชฺช, สกฺยปุตฺตสฺส สาสเนฯ
[89]
‘‘สพฺพเวรภยาตีโต, สพฺพสงฺคาติโค [สพฺพสงฺกาติโต (ก.)] อิสิ;
สาวโก เต มหาวีร, โสณฺณถูปสฺสิทํ ผลํฯ
[90]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[91]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[92]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปุลินถูปิโย เถโร อิมา คาถาโย
อภาสิตฺถาติฯ
ปุลินถูปิยตฺเถรสฺสาปทานํ อฏฺฐมํฯ
9. นฬกุฏิทายกตฺเถรอปทานํ
[93]
‘‘หิมวนฺตสฺสาวิทูเร , หาริโต นาม ปพฺพโต;
สยมฺภู นารโท นาม, รุกฺขมูเล วสี ตทาฯ
[94]